СҮР ЕТ ДАЙЫНДАУ

Категориясы: Тағам

Сүр ет. Сүрлеу дегеніміз – етті қақтап, тұздап сақтау. Сүр ет ерекше дәмді болады. Өзіне тән иісі Өте жағымды. Әдетте еттің сұрпы жағы, яғни қазы, қарта, жал, жая, омыртқа, төс еттері ғана сүрленеді. Сүрлеу үшін ет жұқалап қақталады. Ұсақ тұз сеуіп, көлеңке әрі жел соғып тұратын орынға жайып кептіріледі. 
Кезінде қазақтар етті әбден тұздап, ұнға тығып та сақтаған.

Кей жерлерде етті ыстап та сүрлейді. Ол үшін қақталған ет әбден сорғыған соң арнайы шошалаға ілініп, астына түтін салынады. Сөйтіп шошаланың есігі мықтап жабылады. Ет ыстау үшін тобылғы, қараған, арша, шырша жаққан дұрыс. Сонымен етті температусы 50–60° қою түтінге 12–18 сағат ұстау керек. Ысталды–ау деген кезде жылылығы 10–12 градус орында 6–8 сағат суытылады. 
Сүр ет тек асып пісіріледі. Ол үшін әуелі асатын ет салқын сумен жуылып, 30–35 градусқа дейін жылытылған суға салынып қайнатылады. Жақсы сүрленген ет желке сияқты тарам–тарам болып піседі. 
Піскен сүр ет тақтай үстіне салынып, жұқа етіліп жапырақтап туралады. Содан соң жайпақ ыдысқа әдемілеп салынады да жиегі дөңгелектеп туралған пиязбен әсемделеді. 

  Жарияланған-2016-05-27 13:01:09     Қаралды-8368